NALIT-AG sa kapolisan ang usa ka job order employee sa city hall kinsa nalista nga Street Level Target (SLT) ug anaa sa Directorate for Intelligence (DI) atol sa drug bust operation alas 9:50 sa gabii, Dominggo, Hunyo 21.
Nailhan ang suspek nga si Jomar Lapates Bansag, alyas "Pugak," 38, minyo ug residente sa Purok San Francisco, Brgy. Cogon ning dakbayan.
Sumala ni Lieutenant Colonel Vici Anthony Tababa, hepe sa Digos City Police Office (DCPO), nga narekober gikan sa posisyon sa suspek ang pito ka managlahing pakite sa gituohang shabu ug P1,000 nga marked money.
Nakumpiska sab sa mga otoridad ang usa ka Samsung cellphone nga gigamit sa transaksyon ug wa'y plakang Susuki TS nga motorsiklo.
Matod ni Tababa nga gibana-banang motimbang sa 5.8 gramo ang gidadahang shabu nga nakuha gikan sa suspek ug aduna'y street market value nga P92,800.
Gihikay dayon sa kapolisan ang kasong paglapas sa Republic Act 9165 o nailhang Comprehensive Dangerous Drug Act of 2002 batok sa suspek nga napadlak na sa selda sa DCPO. (Orlando B. Dinoy)