DAVAO DE ORO — Nagbili’g kadaot dili lamang sa mga kadalanan kundi lakip sa pipila ka mga kabalayan ang pag-abot sa Bagyong Kabayan nga miigo ning probinsya, Disyembre 18, 2023.
Gibutyag nga sa lungsod sa Monkayo, partikular sa Sitio Depot, Brgy. Upper Ulip adunay nahitabong pagdahili sa yuta dala sa makusog nga pag-ulan.
Dungan sab niini adunay mga poste sa kuryente nga nangatumba nga miresulta sa brownout sa pipila ka mga dapit sa lungsod.
Ang mga poste nga nangatumba mibabag sa mga kadalanan hinungdan nga lisod nga maagian labi na sa mga dagkong sakyanan.
Sa lungsod sa Montevista, partikular sa National Highway pasulod sa lungsod sa Compostela miapaw ang tubig baha alas 11 sa buntag hinuon, pipila ka oras ang milabay human nga mi-landfall ang nahisgutang bagyo, mihubas ra sab ang maong tubig baha nga miapaw sa dalan.
Sa lungsod sa Compostela, luyo sa pipila ka mga bakwit nga natala , mapasalamaton ang Mayor sa Lungsod, Mayor Levi Ebdao sanglit di sama kaniadto ang gidaghanon sa mga bakwit.
Gipasalamatan sab sa amahan sa lungsod ang giingong billions of flood control program ni Cong. Maricar Zamora nga gibubo sa lungsod sanglit, giingon ni Mayor Ebdao nga kung di pa tungod sa maong programa miawas na ang tubig sa mga kasapaan sa lungsod.