DATU MONTAWAL, Maguindanao -- Gidugok sa katawhan ang gipahigayon nga Bangsamoro Organic Law (BOL) Forum sa nasampit nga lungsod.
Ang panagtapok sa tanan nga sektor inisyatibo nila Datu Montawal Mayor Datu Vicman Montawal ug Bise Mayor Datu Otho Montawal uban ang tibuok puwersa sa lokal nga kagamhanan sa tinguha nga mapasabot ang tinuod nga unod sa BOL.
Mitambong sa BOL Forum ang taas nga mga opisyal sa Moro Islamic Liberation Front (MILF) nga gipangulohan ni Bangsamoro Transition Commission (BTC) Secretary General Professor Raby Angkal.
Gipamahayag ni Angkal nga ang BOL alang sa mugnaon nga Bangsamoro Autonomous Region in Muslim Mindanao (BARMM) dili lamang sa mga Moro apan sa mga Kristiyano sab ug mga lumad.
Ang BARMM nga hulip sa Autonomous Region in Muslim Mindanao (ARMM) maoy tubag sa dugay na nga gipangandoy nga kalinaw ug kalambuan sa mga komunidad nga mahisakop niini.
Sa bag-ong balaod, madugangan ang BARMM sa unom ka munisipyo sa Lanao Del Norte ug 39 ka barangay sa North Cotabato.
Gikanayon ni Datu Montawal Vice Mayor Datu Otho Montawal ug Mayor Datu Vicman Montawal, nga suportado nilang mag-amahan ang BOL apil na ang tibuok katawhan sa Datu Montawal alang sa tinuod nga kalinaw ug panaghiusa sa katawhan sa mga dapit nga mahisakop sa BARMM.
Kahinumduman nga niadtong Hulyo 26, gipirmahan ni Presidente Rodrigo Duterte ang BOL, usa ka balaudnon nga maoy muhulip sa 29 na ka tuig nga ARMM Government. (Edgar Fuerzas)