NAGKAENGKUWENTRO ang mga sakop sa Bangsamoro Islamic Armed Forces-Moro Islamic Liberation Front (BIAF-MILF) ug Islamic State of Iraq and Syria (Isis) Inspired Group alas 2:00 sa hapon, Martes, Enero 10, 2023, sa probinsiya sa Maguindanao del Sur.
Matud ni Eastern Mindanao Front Chief ug Bangsamoro Transition Authority (BTA)-Barmm Member of Parliament Akmad Abas Alhadj alyas Kumander Jack nga nagpahigayon sila og pursuit operation batok sa Isis-Inspired Group sa Liguasan Delta sa Sitio Baongkong, Barangay Dungguan, Datu Montawal sa nahisgutang probinsiyal.
Pasulod pa lamang ang BIAF-MILF forces sa kampo sa mga terorista, gipabuthan dayon sila sa grupo ni Kumander Paglas.
Milungtad og pipila ka minuto ang pagbinayloay og mga bala sa duha ka grupo gamit ang mga tag-as nga matang sa armas hangtud nga miatras kini sa dihang miabot ang dugang puwersa sa MILF.
Walay naangol sa MILF samtang dili makompirma sa bahin sa mga terorista.
Nailog sa MILF ang kampo sa mga terorista ug nakarekober ang mga tag-as nga klase sa mga armas.
Sayo niini, mibakwit ang mga molupyo sa Sitio Baongkong ug Sitio Matiompong sa Barangay Dungguan human sa halos usa ka bulan giyera sa magkaaway nga grupo mao nga gisulod kini sa Eastern Mindanao Front sa MILF.
Kahinumdoman nga ang LGU-Datu Montawal ubos sa pamunoan ni Mayor Datu Otho Montawal unang nang-apud-apod og hinabang ngadto sa mga bakwit.
Sa pagkakaron, padayon nga gigukod sa BIAF-MILF ang Isis-Inspired Group sa lungsod sa Datu Montawal.