BLANGKO pa ang kapulisan sa Tagum City Police Office sa suspek ug motibo sa pagpusil-patay sa usa ka babaye Martes sa hapon, Oktubre 10, 2023, sa Dalisay Gante Road, Magugpo West.
Sa pasiunang impormasyon nga nakalap sa Superbalita Davao, giingong usa ka Brain Jupiter, hamtong ang pangedaron, taga Sison Subdivision, Tagum City ang biktima.
Gikaingon sab nga kanhi manager sa usa ka "lending company" ang biktima, apan wala pa kini gikompirma sa maong lending company.
Nahagba ang biktima kilid sa buhatan sa Yamaha, diin giingong yano lamang nga mibaktas ang mamumuno.
Ginasubay na sa kapulisan sa Tagum City PNP ang mga kuha sa closed-circuit television (CCTV) camera nga nakamuntar sa dapit.
Sa pagsuwat ning balita kagahapon, wala pa nagpagawas og opisyal nga report ang Police Regional Office (PRO) Davao Region labot sa krimen.
Gisubay pa sab ang posibleng motibo sa panghitabo.