ATRASO ang gilantaw sa mga awtoridad nga motibo sa pagpusil patay sa negusyante kinsa kanhi Sangguniang Kabataan chairman sa barangay sa Pikit, Cotabato Province alas 6:00 sa buntag, Sabado, Pebrero 11, 2023.
Giila ang biktima nga si Ansarie Ulangkaya Luntayan, 42, minyo ug nagpuyo sa Barangay Takepan, Pikit.
Matud ni Pikit Chief of Police Lieutenant Colonel John Miridel Calinga, naglingkod lang ang biktima atubangan sa iyang bakeshop sa Barangay Takepan dihang kalit nga niabot ang wa mailhing mga suspek ug gipusil siya gamit ang kalibre .45 nga pistola.
Daling misibat ang mga mamumuno sakay sa motorsiklo paingon sa hilit nga dapit sa lungsod sa Pikit.
Dead on the spot ang biktima dihang naigo sa mga bala sa iyang ulo ug dughan.
Kahinumdoman nga niadtong miaging bulan gipusil na sab ang biktima duol sa iyang uma apan nakalihay ug wala maigo.
Kapulisan sa Pikit Municipal Police Station padayong nag-utingkay sa mga nahipos nga ebidensiya aron nga matumbok ang mga suspek ug madakpan.