MGA opisyal ug tigpromotar sa Kapa-Community Ministry International (Kapa) Inc. malagmit nga mapriso human ang korte nakakaplag og igong ebidensiya aron nga sila arestuhon.
Sa gipagawas nga pamahayag gikan sa Securities and Exchange Commission (SEC), ang Department of Justice (DOJ) nagpasaka og pormal nga kasong kriminal batok sa Kapa, sa iyang mga opisyal ug promoters sa mga regional trial courts (RTC) sa Bislig City, Quezon City ug Rizal.
Matud sa SEC, ang korte nakakaplag og igong hinungdan aron nga magpagawas og warrants of arrest, subay sa Revised Rules of Criminal Procedure, kon diin ang mando sa pagpaaresto sa mga gikasohan nga mga opisyal ug promoters sa Kapa angay nga iisyu.
Sa lahi nga impormasyon nga gipasaka sa Bislig City Regional Trial Court Branch 29, giakushan sa DOJ ang Kapa og “willfully, unlawfully and criminally” nga nalambigit sa pagmalaigya o paghanyag og baligya o nag-apud-apod og “securities” ngadto sa publiko nga way registration statement nga giduso ug giaprobahan sa SEC.
Gikasohan sa DOJ si Kapa Founder and president Joel Apolinario, trustee Margie Danao, ug corporate secretary Reyna Apolinario sa paglapas sa Republic Act No. 8799 o ang Securities Regulation Code (SRC).
Nipasaka sab ang DOJ og kaso batok kang Marisol Diaz, Adelfa Fernandico, Moises Mopia ug Reniones Catubigan sa paglapas sa SRC tungod sa pagpromotar sa investment scam.
Si Diaz gidemanda sab didto sa Rizal RTC kay naglapas sa SRC. Samang mga asunto ang gipasaka batok Mopia ug Fernandico sa Quezon City RTC Branch 93.
“The concerned judges, upon finding of sufficient probable cause for the issuance of Warrants of Arrest, shall order the arrest of the indicted officers and promoters of Kapa, in accordance with the Revised Rules of Criminal Procedure,” sumala sa pahayag sa SEC.
Ang komisyon nakakaplag nga KAPA nagdani sa publiko nga mobubo og P10,000 bugti alang sa 30 porsyento binulan nga tubo, bisan kon way laing himuon gawas sa pag-invest ug maghuwat sa payout.
Nakita sab sa SEC nga ang Kapa naggamit og Ponzi scheme, usa ka investment program nga naghanyag og imposible nga taas nga tubo ug mobayad sa mga nagbubo gamit ang kuwarta nga gidonar sa uwahing mga investors.
Ang Kapa, pinaagi sa ilang counsel on record, sayo niini, nanghimakak nga nagtugot sa pagpublikar sa maong sayop nga pag-angkon sa social media ug nagklaro nga sila si Catubigan ug Ronnie Garay mao lay mosulti “on behalf” sa grupo.
Matud sa SEC, mga indibiduwal nga masayran nga naglapas sa SRC o uban pang dunay kalambigitan sa “rules and regulations” nga giproklamar sa komisyon, mag-atubang og maximum nga multa nga P5 milyon o silot nga pito hangtud 21 ka tuig o ang duha mismo.