CENTRAL MINDANAO -- Usa ang namatay samtang tulo ang naangol sa pagpamanhig sa barangay kapitan alas 11:20 sa buntag kagahapon.
Namatay mao si Ranulfo "Bobong" Lisundra Baustista samtang naangol iyang amahan nga si Barangay Kapitan Santos Bautista, 61, lakip na ang duha ka mga kagawad nga sila Roberto Midsapak, 51, ug Robin Salvador nga mga residente sa Barangay Takepan, Pikit, North Cotabato.
Suma ni Police Supt. Bernard Tayong, tigpamaba sa Cotabato Police Provincial Office, nahitabo ang pagpamanhig samtang sakay ang mga biktima sa KIA Bonggo pick-up gikan sa Barangay ug SK mass Oathtaking Ceremony sa municipal gym sa lungsod sa Pikit.
Giingon nga sa pag-abot sa mga biktima sa national highway sa Barangay Batulawan sa Pikit Cotabato kalit lang gipamusil sa duha ka wa mailhing mga tawo nga sakay sa motorsiklo nga pulos armado og kalibre .45 nga pistola.
Unang naigo ang drayber mao nga wa nakontraol ang manobela ug nabangga kini sa Pauro Mangkap Hardware.
Patay dayon ang anak sa kapitan samtang gidala sa Cruzado Medical Hospital ang mga naangol.
Samtang gisuwat kining balita, padayon pa ang imbestigasyon sa kapulisan.