NANGHIKLING ang mga molupyo sa Siyudad sa Kidapawan sa grabeng nasinating pagbaha nga nagsugod alas 2:00 sa hapon hangtud na gabii niadtong Sabado, Hulyo 16, 2022.
Sumala sa taho gikan sa City Disaster Risk Reduction and Management Office (CDRRMO) nga kusog kaayo ang bul-og sa baha nga midagayday gikan sa tiilan sa Mount Apo.
Miawas sab ang mga kasapaan sa dakbayan ug mipalunop sa mga ubos nga bahin sa lugar.
Dunay mga kabalayan ang nangaguba human gibanlas sa bul-og sa tubig-baha, lakip na ang mga kabtangan.
Minilyon sab ang damyos sa mga pananum nga gikuso-kuso sa baha.
Grabeng naapektuhan sa baha ang mga barangay sa Sudapin, Lanao, Balindog ug Singao.
Dunay daghang natanggong apan naluwas dayon sila sa rescue team sa CDRRMO.
Sa talaan sa CDRRMO, dunay 87 ka pamilya ang naapektuhan sa baha nga temporaryong gipahimutang sa mga luwas nga dapit sa siyudad.
Samtang padayon ang flood assessment sa lokal nga panggamhanan sa Kidapawan ug ang apud-apod sa hinabang sa mga naapektuhan sa baha.