NORTH COTABATO -- Luwas na sa makatakod nga kagaw sa baboy ang siyudad sa Kidapawan ug mahimo nang magbuhi ug magpadaghan og baboy ang mga hog raisers ug mag-uuma.
Mismo ang buhatan sa Department of Agriculture (DA)-Soccsksargen Regional Animal Disease Diagnostic Laboratory (RADDL) ang nagdeklara nga African Swine Fever (ASF)-free areas na ang lima ka barangay sa dakbayan nga unang naigo sa kagaw.
Kini gilangkuban sa mga barangay sa Linangkob, Mua-an, Sikitan, Gayola ug Paco nga maoy hinungdan sa pagkalugi sa mga hog raisers.
Ang deklarasyon nahitabo human migawas ang negative results o negative viral antigen sa tanan nga proseso nga nahiunod sa Exit from Quarantine Protocol sa lima ka barangay.
Matud ni City Veterinarian Dr. Eugene Gornez nga ang mga hog raisers sa nahisgutang mga barangay maoy unang nisumiter sa gikinahanglang sample gikan sa apektadong mga baboy inabagan sa ilang buhatan ug sa Provincial Veterinarian's Office sa Amas, Kidapawan City.
Gikanayon ni Gornez nga base sa DA Administrative Order 7, o ang Implementing Guidelines sa Bantay ASF sa Barangay Program kinahanglan nga mag-obserbar sa mga piniling binuhing baboy ug mokuha og sample sama sa "swabbing" niini aron matuki ug matino kon aduna pa bay ASF virus partikular sa apektadong barangay.
Gipangunahan ni Gornez ang tulo ngadto sa upat ka buwan nga pag-inspeksiyon sa mga baboy dungan sa naandang pagpanglimpyo ug disinfection sa mga baboy, ingon man surveillance ug inspeksiyon sulod sa 500 metros nga radius sa apektadong lugar.
Sa laing bahin, makonsiderar usab nga ASF-free area ang tibuok dakbayan sa Kidapawan, matud sa CVO.
Nanawagan ang buhatan sa tanan nga magtinabangay aron ang mga binuhing baboy dili na mataptan sa sakit.