HUGTANON karong gibantayan sa City Health Office (CHO) si Konsehal Narry Amador sa Kidapawan City.
Nasayran nga nagpakahilom lang si Amador kabahin sa iyang pag-adto sa derby sa New Matina Gallera sa Davao City niadtong niaging bulan.
Apan gipamahayag mismo ni Amador nga wala siyay nasinatian nga sintomas sa coronavirus disease (Covid 19) ug boluntaryo siya nga mipailawom og 14-day quarantine.
Gikanayon ni Dr. Erwin Palmones sa City Health Office nga bisan natapos na ni Amador ang iyang incubation period, subli siyang gipailawom sa 14-day straight monitoring.
Apil sa gipanid-an sa CHO ang igsuon ni Amador nga si Alan nga miadto sab sa derby.
Gimonitor sab ang pamilya nila Amador, ilang mga silingan ug mga paryente.
Gipangatarungan ni Amador nga wala dayon niya gipahibawo nga miadto siya sa derby gumikan gisunod niya ang protocol ug mipailawom una siya sa 14-day quarantine.
Apan gikanayon nga hangtud karon wala siyay nasinatian nga sintomas sa Covid-19.
Nanawagan ang City Health Office sa Kidapawan sa mga sabongero nga nakasalmot sa derby sa Davao City nga mokonsulta dayon sa ilang buhatan. (Edgar E. Fuerzas)