Kusog hangin, ulan nipa-brownout

Nakasinati og brownout tibuok gabii ang pipila ka mga lugar sa Dakbayan sa Davao human adunay natumba nga poste sa kuryente ug nangabali nga mga kahoy nunot sa kusog nga hangin niadtong Sabado, Septiyembre 16, 2023.

Gawas sa natumba nga poste ug kahoy, matod sa Davao Light and Power Company (Davao Light) aduna sab nalupad nga atop sa bodega gikan sa planta sa lana sa lubi sa Panacan pasado alas tres sa hapon niadtong Sabado.

Nunot sa mga panghitabo, apektado ang pipila ka mga dapit sa Panacan paingon sa Tibungco Public Market ug crossing Malagmot paingon sa Unifrutti.

Pagka alas 7:13 sa buntag na sa Dominggo, Septiyembre 17, 2023, nibalik ang kuryente sa maong mga dapit.

Samtang, apektado sab sa brownout ang Barangay Lubogan, Toril District ug Talomo area human nga natumbahan og kahoy ang linya sa kuryente sa maong mga dapit.

“Davao Light apologizes to its customers for the inconvenience that was brought about by this emergency power interruption/s,” matud pa sa pamahayag sa Davao Light.