BANSALAN, Davao del Sur -- Wa na matabang bisan og gihatud ngadto sa bay tambalanan ang usa ka lalaking tighimo og lapida human namatay sa dihang gipusil sa wala mailhing suspek nga nagsakay og motorsiklo.
Nahitabo ang insidente sa dalang Dama de Noche sa Barangay Poblacion Uno, alas 4:20 sa hapon, Biyernes, Septyembre 20.
Biktima giila ni Police Major Rodante Varona, hepe sa Bansalan Police Station, nga si Eugenio Labajo Sr., 57, molupyo sa Sitio Curvada sa lungsod.
Sumala ni Varona, adunay mga testigo nga nakakita sa mga suspek nga nagsakay og kolor orange nga Honda RS motorsiklo.
Ang drayber sa motor nakasul-ob og kolor puti nga t-shirt ug itom nga pantalon ug ang angkas kinsa giingong maoy namusil, nakasul-ob og kolor brown nga jacket.
Ang biktima gideklarang patay na sa dihang gihatud sa balay tambalanan.
Gitahasan na ni Varona si Patrolman Wilfred Son nga mohimo og lawom nga imbestigasyon aron masuta ang motibo sa krimen ug kinsa ang mga suspek.
Naglibog sab ang mga silingan sa biktima sa motibo sa pagpamusil sanglit way atraso ang biktima sa ilang dapit. (Orlando B. Dinoy)