DAVAO DE ORO -- Usa ka tawo ang patay sa pagdahili sa yuta sa Purok 10, Patindol, Mt. Diwata, Monkayo alas 4:00 sa buntag, Martes, Pebrero 11, 2020.
Ang namatay giila nga mao si Abner Abejo, 37, ulitawo nga taga Gingoog City ug kasamtangang nanimuyo sa maong dapit.
Base sa inisyal nga imbestigasyon, ang biktima natulog sa kusinang bahin sa balay nga gipanag-iyahan ni Lucy Petallana dihang kalit nga midahili ang yuta gumikan sa pagbundak sa makusog nga ulan.
Matud pa nga naguba ang balay ni Petallana nga diin naigo sa pagdahili sa yuta diin natulog ang biktima.
Giingon nga natabunan sa midahiling yuta ang biktima nga miresulta sa iyang kamatayon.
Sa pagsulat ning maong balita, padayon pa ang gihimong pagsusi sa mga personahe sa Mt. Diwata Special Sub-Police Station uban sa mga personahe sa Barangay Risk Reducation Management Office ug Municipal Risk Reduction Management Office alang sa posibleng search and rescue sa dapit nga nahitaboan. (Dexter T. Visitacion)