MIPIYAIT sa kalisod nga nasinati ang pipila ka mga miyembro sa grupo sa Lesbian, Gay, Bisexual, Transgender, and Questioning (or Queer) LGBTQ+ sa lungsod sa Compostela, Davao de Oro.
Sanglit usa ang LGBTQ+ sa labing naapektuhan sa krisis sa coronavirus disease (Covid-19) human nawad-an og pagkakitaan gumikan sa pagpasara sa mga parlor ug mga boutique ingon man ang pagkanselar sa mga okasyon sama sa pista ug mga coronation nights nga maoy sagad nilang panginabuhian bugti sa serbisyo nga ilang matunol.
Si Lyncie John Hinampas, usa sa mga miyembro sa maong grupo, nagbutyag dihang nahinabi sa Superbalita Davao nga gumikan kay naundang ang gitrabahoan niini nga parlor, napugos siya pag-uli sa ilang barangay sa Barangay Maparat ug nangdiskarte pinaagi sa pagdawat og home service.
Hinuon, nagpasalamat si Hinampas sa ayuda nga hinatag sa gobyerno nga iyang nadawat nga gilangkuban sa bugas ug mga de lata nga sud-an.
Ang presidente sa LGBTQ+ sa lungsod nga si Michael "Nicole" Peralta mipadayag usab sa problema sa mga balayrunon sanglit, sirado ang negosyo niyang wedding boutique ug kanselado ang tanang mga kalihukan labi na ang kasal nga maoy nag-una niyang gina-serbisyohan.
Matud pa nga nahagba gyod sa pagkakaron ang ilang panginabuhian sanglit, sagad sa ilang panguwarta naggikan sa mga events, apan taliwala sa kalisod gibutyag ni Peralta nga adunay mga kahigalaan nila sa konseho nga mitabang ug mipaabot og hinabang sama nila Konsehal Ricky Hechanova, Konsehal Myrel Visitacion Bancasan, Konsehal Juric Blanco ug Vice Mayor Levi Ebdao nga mihatag kanila og bugas ug mga gulay.
Dugang gibutyag ni Peralta nga luyo sa nasinating pandemic, dili mahimong mapadaplin ang giingong gugma sanglit kasagaran kanila parehong inlove ug padayon ang komunikasyon sa tagsa-tagsa nila ka mga hinigugma pinaagi sa chat ug videocall.
Hinuon, giagwanta usa nga di makita sa personal ang mga karelasyon aron masunod ang social distancing.
Dako ang panghinaut ni Peralta nga masulbad ra sa di madugay ang problema sa Covid-19 ug malagpasan ra usab nilang mga sakop sa LGBTQ+ community ang kalisod sa kinabuhi taliwa sa gipatumang enhanced community quarantine sa rehiyon. (Dexter T. Visitacion)