COTABATO CITY -- Moabot sa 29,338 ka pamilya gikan sa 11 ka mga lungsod sa Maguindanao del Sur ang gipabakwit nunot sa nasinating pagbaha sugod niadtong Lunes, Septiyembre 18, 2023.
Matod ni Provincial Disaster Risk Reduction and Management Officer Ameer Jehad "Tim" Ambolodto nga ang mga lungsod nga gibahaan mao ang Datu Hoffer, Shariff Aguak, Pagalungan, Datu Montawal, Datu Anggal Midtimbang, Pandag, Talayan, Guindulongan, Datu Saudi Ampatuan ug Datu Unsay.
Sa Shariff Aguak, 79 ka barangay ang apektado sa baha kon diin gihulagway nga ang tubig-baha dunay sagol nga mga lapok gikan sa kabukiran, apil na ang lungsod sa Datu Hoffer.
Hinuon, way gitaho nga naangol o namatay apan naglisod ang mga rescuer tungod sa taas nga lebel sa baha.
Una nang nipagawas og pasidaan ang Philippine Atmospheric, Geophysical and Astronomical Services Administration (Pagasa) sa mga pag-ulan nga masinati apan wala magdahom ang mga molupyo sa mga nahisgutang lugar sa dakong bul-og sa baha.
Nanawagan si Ambolodto sa mga opisyales sa barangay nga palihukon ang barangay rescuers aron nga makaabag sa pagluwas sa mga naipit sa baha.
Atol sa pagsuwat ning balita, anaa na sa luwas nga lugar ang mga bakwit.