MALALAG, Davao del Sur -- Nadakpan na sa kapulisan ang lalaking suspek sa pagpanunggab sa natulog niyang ig-agaw.
Sa tahong gipaguwa sa Malalag Municipal Police Station, nasayran nga nahitabo ang insidente didto sa Purok Bombil, Brgy. Bulacan, alas 7:15 sa gabii, Biyernes, Hulyo 31.
Milutaw sa imbestigasyon sa kapulisan nga ang biktimang si Reynald Mamales Diamale, 45, minyo, laborer nakahiagom og samad dinunggaban sa liog.
Matud ni Lieutenant Sandique Solaiman, officer–in-charge sa sa Malalag MPS nga kalit miabot ang suspek nga si Jerwin Diamale Pedro, 25, ulitawo, residente sa samang dapit, ug sa pagsud niini sa payag sa biktima, way daghang rason, iya kining gidunggab.
Nasayran gikan kang Solaiman nga dunay karaang bikil ang mag-agaw ug hayan maoy hinungdan aron nga tinguha niining patyon si Reynald.
Human sa insidente paspas nga misibat ang suspek sa wa matinong dapit hinungdan nga naglusad ang kapulisan og hot pursuit operation nga miresulta sa pagkasikop sa suspek.
Samtang natabang sab ang biktima pinaagi pagdala kaniya ngadto sa Golingay General Hospital, una gibalhin sa Davao del Sur Provincial Hospital.
Sa uwahing impormasyon nga nakuha gikan sa kapulisan kagahapong adlawa, nasayran nga nagkasabot na ang duha ka partido nga ilang husayon ang kaso didto sa buhatan ni Bulacan Brgy. Kapitan Alberto Bragat.