SUKAD niadtong Martes sa gabii, Nobiyembre 22, 2022, gisugdan na ang localized lockdown sa Purok Talitay ug Pag-asa sa Barangay Rosary Heights 7, ug Purok Masagana ug sa perimeter area sa Fiesta Mall ug Barangay Rosary Heights 10 sa Siyudad sa Cotabato tungod sa intelligence reports nga nadawat sa City Peace and Order Council (CPOC).
Kini kabahin sa mga hulga sa seguridad ug presensiya sa mga armadong indibidwal sa dakbayan.
Magsugod ang lockdown alas 8 sa gabii ug matapos sa alas 4 sa buntag.
Ang executive order (EO) nagtumong sa pagsiguro sa kaluwasan sa publiko taliwala sa mga hulga sa seguridad sa mga hingtungdang lugar.
Gimanduan na ni Mayor Bruce Matabalao ang kapulisan ug barangay officials sa siyudad sa pagsiguro nga walay mosulod o mogawas sa mga lugar atol sa lockdown.
Samtang, ang mga outpost sa mga designated areas dumalahon 24 oras sa City police, Task Force Kutawato ug sa mga force multipliers.
Gipaabot usab nga higpit ang random checkpoints sa dakbayan.
Kahinumdom nga upat ang patay sa pagpamusil sa siyudad nga gikaalarma sa mayor.