LUAGAN sa lokal nga panggamhanan sa siyudad sa Davao ang istriktong lockdown karong Biyernes, Mayo 8, aron nga tugotan ang mga pribadong behikulo makasundo sa mga natanggong mga kabanay sulod sa dakbayan sa dakbayan sulod lang sa 12 oras.
Gikanayon ni Davao City Mayor Sara Duterte-Carpio niadtong Lunes, Mayo 4, nga ang lokal nga panggamhanan mopagawas sa kompletong guidelines sulod ning semanaha.
“Mao ni sila tong stranded inside Davao City, and dili sila gusto moapil atong mga pahatud nato balik didto sa ilang probinsya... gusto nila sunduon sila og private vehicles. Duna na tay guidelines na ipagawas satong mga social media in the following days,” tin-aw ni Duterte-Carpio sa paghinabi kaniya sa 87.5 FM Davao City Disaster Radio.
Naumol ang mando human ang pipila ka adlaw nga ang lokal nga kagamhanan nagtugot sa nagkadaiyang LGUs nga moluwas sa ilang mga natanggong molupyo balik ngadto sa ilang lokalidad, ug ang gilusad sa dakbayan nga “outbound sweeper flights” alang sa mga natanggong nga pasahero gawas sa rehiyon.
Samtang si City Tourism Operations Office (CTOO) head Generose Tecson sa paghinabi niadtong Lunes sa buntag nagsulti nga ang desisyon nga luagan ang gipatumang sumbanan sa lockdown nahitabo human nga nidaghan ang mga panawagan gikan sa di molupyo sa Davao nga tugotan sila nga mosulod sa siyudad aron nga sunduon ang ilang mga kabanay.
Matud ni Tecson nga mga doktor, uban ang mga tinugyanan sa balaod, maoy magbantay sa pagpatuman niini.
Ang opisyal nagsulti nga mga checkpoints sa siyudad buksan alang sa mga pribadong behikulo alas 8 sa buntag ug 4 sa hapon.
Apan duna lay tugtan nga usa ka drayber ug usa ka kaabag niini sulod sa sakyanan. Ug una sila makasulod, kinahanglan nga makigkoordinar una sa Davao City Stranded Persons Database Center (DCSPDC).
Mga indibiduwal nga dunay pribadong mga sakyanan, kinahanglan nga magpadala og email ngadto sa CTOO uban sa matang sa ilang behikulo, plaka numero, pangalan sa drayber o kaabag, pangalan ug adres sa natanggong nga tawo, ang entrada ug gawsanan base sa ilang rota ug ang petsa sa ilang pag-abot.
Matud ni Tecson nga makadawat sila og confirmation letter gikan sa CTOO, nga ilang ipresentar ngadto sa mga awtoridad sa mga checkpoints sa mga utlanan.
“You should do it several days before you planned to fetch your companions here in Davao City. Without this confirmation letter, you cannot enter the city. This letter will be presented at the entry points indicated in your details,” tin-aw niya.
Dugang pa sa opisyal nga di na mausab ang ilang gipadala nga “pick-up routes” kung ila na kining masumite ngadto sa lokal nga kagamhanan. (Ralph Lawrence G. Llemit)