SUGDAN na karong Mayo 29, 2023 sa Davao City Economic Enterprise (CEE) ang "mass exhumation" sa mga 315 ka mga minatay nga gilubong sa Tagakpan Public Cemetery.
Ang pagkubkob kabahin sa "preparatory stages" alang sa ikaduhang phase sa P85-milyones nga renovation program sa CEE alang sa maong sementeryo.
“Nagpahibalo mi sa general public nga mag-conduct mi og mass exhumation sa Tagakpan Public Cemetery. Kani, in preparation sa phase two sa atong project," pagpahibawo ni CEE Head Maximo Macalipes sa paghinabi uban ang mga tigbalita niadtong Lunes.
Ang unang "phase" sa "rehabilitation program", nga nikantidad og P50 milyones sa kinatibuk-ang badyet, naa na karon sa 99 porsiyento nga "completion rate" ug itunol og balik alang sa operasyon karong tuiga.
Ang unang hugna o "phase" sa sementeryo sa Tagakpan gilangkuban sa 320 ka yunit "compartmentalized" nga lugar, 560 ka ossuary units, 174 mass graves, sementeryo sa Muslim, open space alang sa paglubong sa Muslim, bone depository, administrative building, guard houses ug security lights.
Ang ikaduhang hugna naglakip sa dugang "compartmentalized" nga mga lubnganan, ossuary niches, perimeter fence, entrance/exit gate, road concreting, drainage system, columbarium ug kapilya.
Mga pamilya ug mga kabanay nga maapektuhan sa renobasyon gitambagan nga mobisita sa Tagakpan Public Cemetery aron nga masayran kon unsay buhaton sa mga nahabiling bukog sa ilang minahal sa kinabuhi.
Gidugang ni Macalipes nga ang mga pamilya mahimong mopili nga mga bukog sa mahal nila sa kinabuhi ideposito ngadto sa bone depository sa sementeryo hangtud mahuman ang rehabilitasyon sa sementeryo. Makapili sila nga ilubong og balik ang mga bukog sa ilang minahal sa kinabuhi sa laing mga sementeryo. Laing opsiyon mao ang pag-cremate niini.
Ang krematoryo sa siyudad bag-ohay lang gibuksan alang sa ilang serbisyo sa non-Covid-19 nga pasyente, tug-an ni Macalipes, ug modawat na og "exhumed bones". Ang gikubkob nga bukog mahimong i-cremate sa krematoryo sa siyudad sa kantidad nga P10,000.
Mga kabanay ug kadtong dunay gustong ipaabot mahimong mobisita lang sa Tagakpan Public Cemetery aron nga magiyahan sa "staff" aron nga maandam ug matakda ang "exhumation" sa mga bukog sa ilang mga mahal sa kinabuhi. (Uban sa taho sa CIO-Davao)