GIDEKLARANG patay na paghiabot sa tambalanan ang usa ka maestro human gipusil alas 5:25 sa hapon niadtong Biyernes, Hulyo 13, ning dakbayan sa Cotabato.
Giila ang biktima nga si Nasser Gayak, 40, minyo, nagtudlo sa Buliok High School ug molupyo sa Barangay Buliok, Pagalungan, Maguindanao Province.
Gibutyag ni Senior Superintendent Rolly Octavio, Cotabato City Police Office director, nga naglakaw lang ang biktima sa dalan Japal Guiani, eskina sa dalan Jose Lim Sr. atbang sa New Tams Bakery sa Barangay Rosary Heights 1 sa dakbayan.
Apan kalit lang siyang gisugat sa nag-inusarang lalaki ug gipusil gamit ang kalibre .45 nga pistola ug daling miikyas paingon sa hilit nga dapit sa dakbayan sakay sa motorsiklo nga gimaneho sa naghuwat nga kauban niini.
Daling gitabang ang maestro sa mga nagresponde nga pulis ug gidala ngadto sa Cotabato City Emergency Hospital apan patay na kining nahidangat.
Nasayran nga nakaangkon og igo ang biktima sa tangkugo ug likod nga bahin sa lawas nga gituohang maoy hinungdan sa iyang kamatayon.
Gipasusi na ni Cotabato City Mayor Cynthia Guiani Sayadi ang mga kuha sa CCTV sa mga tindahan duol sa lugar kon diin gipatay ang biktima aron mailhan ang mamumuno. (Edgar E. Fuerzas)