PADADA, Davao del Sur -- Nanawagan karon ang pamilyang Rabor ngadto sa mga awtoridad nga di una undangon ang retrieval operation hangtud di maabot ang first floor sa building sa Southern Trade Commercial Center nga nalubong na sa yuta.
Kini human wa na igkita ang mag-inahang sila si Brenda, 47, ug Honey Bee Rabor, 17, mga molupyo sa Barangay Buguis, Sulop sa maong probinsiya.
Nipatim-aw sa Padada Municipal Police Station ang igsuon ni Brenda nga si Romeo Rabor niadtong Miyerkules ug nitaho nga sukad niadtong adlaw’ng Dominggo wa na makauli sa ilang balay ang mag-inahan.
Sumala ni Police Captain Arnold Absin, hepe sa Padada MPS, nga gitahong nagbaligya og kopras sa lungsod ang mag-inahan.
Matud niya nga dako ang pagtuo sa pamilya nga misulod sa Southern Trade ang mag-inahan ug naapil nga natabunan sa nahugmak nga grocery store.
“Kana man god diha daghan gyud na og tawo ilabi na Dominggo to so naay daghang mamalit diha,” matud ni Absin.
Nasayran nga giundang na sa Incident Command Post ang retrieval operation niadtong Martes sa gabii human nasuta nga wa nay na-detect ang thermal machine ug K-9 dog nga duna pay kinabuhi sa ilawom nga bahin sa building.
Apan dako ang panaghap sa pamilyang Rabor nga namalit og sapatos sa sud sa building ang mag-inahan dihang naabtan sa linog.
Hinuon, gitataw ni Absin nga magpadayon ang debris clearing tungod kay wa pay makapamatuod nga anaa gyud sa sud ang mag-inahan. (Orlando B. Dinoy)