GIBUTYAG sa kasundalohan nga mga sakop sa New People’s Army (NPA) ang responsable sa pagsunog sa trak sa Sumifru ug pagpusil sa mag-inahan nga sakay niini sa Barangay Mangayon, Compostela Valley Province Biyernes sa gabii, Nobyembre 30.
Subay sa pamahayag sa 66th Infantry Battalion (66IB) usa ka giingong diversionary tactics kini sa rebeldeng NPA sa alegasyong gibuhat sa grupo ni Satur Ocampo sa Talaingod, Davao del Norte.
Subay sa medical bulletin anaa sa kritikal nga kondisyon ang mag-inahan nga Daisy Safuentes, 30-anyos ug John Safuentes, 5-anyos human sila naigo og bala sa dihang giparakrakan sa NPA ang ilang gisakyan nga trak.
Tungod sa hitabo, gitawag ni Lieutenant Colonel Palmer Parungao sa 66IB ang NPA nga kriminal ug kawatan sa salapi sa katawhan ug tigbungkag og kalinaw.
Sa kasamtangan ang militar nagpahigayon og mga operasyon sa kabukiran sa paggukod sa mga rebeldeng NPA. (Jeepy P. Compio)