MONKAYO, Davao de Oro -- Usa ang patay samtang usa ka nasamdan sa magsuong gipamusil sa ilang ig-agaw sa Purok 12, Barangay Pasian alas 5:30 sa buntag niadtong Huwebes, Disyembre 12.
Ang namatay mao si Alvin Duron Usmag, 32 anyos, minyo, samtang angol sab ang maguwang nga si Rowaldo Duron Usmag, 34 anyos, minyo, parehong molupyo sa Purok 12, Barangay Pasian, samtang ang gitumbok nga suspek mao ang ig-agaw nga ginganlan og Anthony Usmag Capao, 32 anyos, minyo, mag-uuma ug molupyo sa samang dapit.
Base sa inisyal nga imbestigasyon, samtang ang mga biktima naglansad sa ilang manok panabong atubangan sa balay sa ilang ginikanan, kalit miduol ang suspek ug sa wa’y daghang istorya gipamusil ang mga biktima sa makadaghang higayon gamit ang wala matinong kalibre sa armas.
Human sa pagpamusil gilayong misibat ang suspek diin usa ka manhunt operation ang gihimo karon sa kapulisan.
Patay dihang nahidangat sa Compostela Valley Provincial Hospital sa lungsod sa Montevista ang manghud samtang gibalhin sa ospital sa Tagum ang maguwang kinsa nakahiagom og daghang mga samad sa kalawasan.
Narekober gikan sa crime scene ang lima ka basiyo sa bala ug usa ka buhing bala sa caliber .45 nga armas.
Migula sa inisyal nga imbestigasyon nga bangi sa yuta ang usa sa mga gitumbok nga hinungdan sa maong kremin. (Dexter T. Visitacion)