TUNGOD sa bag-ohay lang nga implementasyon sa SIM card registrations sa nasud, mga mangingidlad nakakaplag og laing paagi sa pagpakatap pa sa ilang kalihukan pinaagi sa pagtigbas (hacking) sa "online accounts and pages", ilabi na sa Facebook and emails, butyag sa opisyal gikan sa Regional Cybercrime Unit (Racu-Davao Region) atol sa AFP-PNP Conference Miyerkules, Agosto 30, 2023.
"Marami pa rin ang narereports sa atin on illegal access with regard sa social media account [this is] due to the SIM card registrations, nag-evolve na sila yung mga scammers natin," pagtin-aw ni Police Community Relations (PCR) Police Major Julius Santilla.
Dugang pa niya nga kining maong cyber predators nga nagkatap sa online platforms mangayo og salapi pinaagi sa pagmensahe ug pagpadala og "sheets or links" kon asa nimo mabutang ang imong personal nga mga impormasyon ug bisan digital ug bank accounts.
Sa dihang gipangutana kon unsaon nga dali matumbok ang scam accounts online, gisulti sa opisyal nga importante kaayo nga pangitaon ang ilang ihap sa mga followers, mga higala, ug ang blue mark check o Meta verification.
"Unang-una, before you engaged sa online, tingnan nyo muna kung legitimate ba ang account ng kausap nyo," pasidaan niya.
Ang SIM Registration Act, opisyal nga gidesignar isip Republic Act No. 11934 ug naila isip SIM card law, mao ang balaod sa Pilipinas nagmando sa pagrehistro sa SIM cards una ang "activation" niini. Ang balaod nagtumong sa pagpakgang sa kalihukang cybercriminal ilabi na sa pagpangilad gamit ang text. Gipalihok sab kini aron nga matubag ang mga uban pang dunay kalambigitan sa "trolling, hate speech, and online disinformation".
Bag-ohay
Bag-ohay lang, ang Securities and Exchange Commission (SEC) nagpagawas og pahimangno batok sa Bagong Bansang Maharlika (BBM) International Inc. nga dunay operasyon sulod sa SEC-Davao’s Area of Responsibility ug bisan sa social platforms. Ang maong pangilad naglumay sa potensiyal nilang miyembro pinaagi sa paghanyag sa ilang "medical, livelihood, food security, free education, and cash assistance" alang sa mga senior citizens bugti sa ilang P100 aron nga tagaan og identification card.
Sukad sa pagsuwat niini, wala pa makapagawas ang RACU-Davao Region og mga datus ug kinatibuk-ang ihap sa mga nalambigit nga online scams sa Davao City alang sa unang kuwarter sa 2023.