AMPATUAN, Maguindanao -- Wala mapugngan ni Maguindanao 2nd District Representative Esmael “Toto” Mangudadatu ang iyang emosyon ug kasuko dungan sa ika-10 ka tuig nga anibersaryo sa mangilgig nga masaker sa Ampatuan, Maguindanao niadtong Nobiyembre 23, 2009.
Sa mensahe ni Mangudadatu sa atubangan sa mga pamilya sa mga biktima, media ug pipila nga mga opisyal sa gobyerno, giingon niya nga bisan 10 ka tuig na ang milabay, wala pa niya malimtan ang kasakit nga giantos sa iyang pamilya human sa pagkamatay sa iyang asawa, mga igsuon ug pila ka paryente.
Mitulo ang luha sa kongresista sa diha nga iyang gipamahayag nga gilugos ang tanang babaye nga uban sa masaker ug gipusil pa sa ilang kinatawo.
Wala usab mapugngan ni Mangudadatu ang iyang kasuko human nahibal-an nga ang pipila sa mga pamilya sa mga biktima gisulayan nga suhulan aron mo-atras batok sa mga Ampatuan nga gitudlo nga utok sa masaker.
Gihagit sa opisyal ang mga pamilya sa mga biktima sa masaker nga dili magpahaylo sa tanyag nga kuwarta ug hinumdumon niini ang kabangis sa mga suspek sa pagpatay sa 58 ka tawo lakip na ang 32 ka sakop sa media
Ilabina nga duol na sab ang promulgasyon sa kaso nga gitakda karong Disyembre 20.
Gipadayag sa ni Mangudadatu ang iyang kaandam nga makigsangka sa kaso hangtod sa katapusan aron makab-ot ang hustisya nga ilang gipaabot. (EEF)