PADADA, Davao del Sur -- Gihangop sa mga molupyo ug mga opisyal sa lungsod ang pagbisita ni Davao City Mayor Sara Duterte-Carpio kanila niadtong Biyernes sa buntag, Hulyo 13.
Sakay sa chopper, miabot ang anak ni Presidente Rodrigo Duterte sa lungsod ug gisugat ni Mayor Pedro Caminero ug mga mayores sa probinsiya sa pagpanguna ni League of Municipalities of the Philippines Chapter President ug Hagonoy Mayor Conrado Laza, Magsaysay Mayor Arthur Davin, Digos City Mayor Joseph PeƱas ug Bansalan Vice Mayor Edwin Reyes.
Anaa sab ang mga sakop sa Sangguniang Panlalawigan nga gipangunahan ni Bise Gobernador Aileen Almendras ug mga Bokal nga sila Erwin Llanos, mag-amahang Victor ug Lanier Cadungog, Anna Margarita Razonable, ug Nonito Llanos III.
Ang pagbisita ni Mayor Duterte-Carpio nagdala sa "Pagbabago Program" sa lungsod isip kabahin sa pagtimbaya niini sa ika-65 nga Araw ng Padada karong adlawa.
Adunay 500 ka mga tinun-an ang nakadawat og mga school supplies ug 500 ka kababayen-an ang nahatagan og mga contraceptive kits isip kabahin sa programa nga gisugdan sa siyudad sa Davao.
Karong adlawa saulogon sa lungsod sa Padada ang iyang kasumaran diin ang pinasidunggang bisita mao si Davao Occidental Claude Bautista.
Daghan nang mga mayor ang mibiya sa ilang suporta kang Governor Douglas Cagas tungod sa alegasyong nga daghan ang wala makauyon sa batasan ni Congresswoman Mercedez Cagas nga magpunay og pangasaba nila.
Gikan Padada, mibalik sab dayon si Mayor Duterte-Carpio sa Davao City ug mitambong sa 2nd LMP Mindanao conference diin anaa ang tanang mayor sa Mindanao sulod sa SMX convention center.
Subling giklaro sa mayor nga di siya modagan og senador apan gi-endorso niini nga angayang suportahan sa mga kaubanan sila si Special Assistant to the President Bong Go, kanhi Philippine National Police Chief Ronald dela Rosa, Ilocos Governor Imee Marcos ug Senador Cynthia Villar sa 2019 midterm election.
Matud niya nga wa pay klaro kung si dela Rosa modagan nga senador o mag-gobernador sa Davao del Sur nga yutang natawhan niini.
Nianang pagka-hapon miabot sab si Presidente Rodrigo Duterte ug subling gipahinumdoman niini ang mga mayor sa kampanya batok sa ilegal nga druga.
Gibutyag sa president nga walay angayang kabalak-an ang mga mayor sa ilang seguridad kon wa kini malambigit sa ilegal nga kalihukan.
Apan angayang magbantay gihapon sa ilang kaugalingon ilabi na nga taliabot ang piliay.
Gitataw sab niini nga iya nang gitun-an ang pagbalik sa kapulisan nga mag escort sa mga mayor. (Orlando B. Dinoy)