NANAWAGAN si Davao City Mayor Sara Duterte-Carpio ngadto sa mga Dabawenyos nga di mag-panic luyo sa duha ka kompermadong nagpositibo sa coronavirus disease (Covid-19) sa dakbayan sa Davao.
Giingon ni Mayor Sara nga gilauman nga dunay duha ka nagpositibo sa Covid-19 sa Davao, diin nagpahimangno ang mayor nga motuman ang katawhan sa mga preventive measures nga gipatuman karon sama sa pagpundo sa balay, dili mo-travel, social distancing, ug ang paghugas sa kamot gamit ang tubig ug sabon.
“Kapila na gibalik-balik, every hour sa atong radio. Ang akong message, ‘diba kadtong akong—public address nako nga nag-ingon ko nga moabot gyud na sa atoa, and karon finally, naa na gyud siya dinhi sa atong siyudad," ingon ni Mayor Sara.
Ang mag-asawa nga unang nabalita nga nagpositibo, dunay travel history sa Metro Manila ug miabot sa Davao City niadtong Marso 6. Ang mag-asawa asymptomatic ug anaa lamang sa home quarantine.
“Do not panic because ang kinahanglan nato buhaton karon is to ensure nga gisunod nato katong gisulti sa doctor,” butyag sa mayor.
Dugang ni Mayor Inday Sara nga molayo sa mga tawo nga gikan sa Metro Manila nga nag-positibo sa Covid-19 cases, ug motawag dayon sa Covid-19 Operation Center kung dunay mabati nga flu-like symptoms ug kalibanga.
“The only time nga mag-panic mo is kung makita ninyo nga nag-panic nako. Buot pasabot ana end of the world na. So kung wala ko nag-panic, ayaw mo’g panic," pahimangno ni Mayor Inday.
Giingon sab sa mayor nga importante sa tanan mao ang pag-ampo ug pagsunod sa mga guidelines gikan sa doktor ning mga panahona.