DAKO ang pasalamat sa kapulisan sa Davao City Police Office (DCPO) ngadto sa mga opisyal sa barangay sa siyudad human nga walay natala nga mga kasamok sa pagsaulog sa Pasko.
Kini ang gibutyag ni DCPO spokesperson Police Major Catherine dela Rey atol sa interbyu sa Davao City Disaster Radio.
Sulti ni dela Rey nga sa barangay palang daan napugngan na sa mga opisyal ug mga barangay tanud nga di matigayon ang kasamok.
"Kadtong mga batan-on nga gilauman natong magsinamok sama sa paghimo og riot, wala gyud nahitabo kay sa barangay palang napugngan na," sumala ni Dela Rey.
Sa kinatibuk-an, generally peaceful ang selebrasyon sa Pasko sa tibuok Dakbayan sa Davao diin walay natala bisan usa ka firecracker related incident gikan Disyembre 1 hangtud Disyembre 25 gawas lamang sa nakumpiska nga lantaka o portable cannons nga apil sa gibawal ubos sa firecracker ban sa Davao City.
Gibutyag sab sa opisyal nga sa kinatibuk-ang siyam ka kaadlawon, walay natigayon nga riot gawas sa mga simbahan atol sa Misa de Gallo.
Dugang ni Dela Rey nga nagsugod nasab sila sa pag-monitor batok sa mga mosulay sa pagpasulod o pagbaligya og mga pabuto sa Davao City diin gibawal kini.