MOABOT ngadto sa 107 ka mga indibiduwal kinsa biktima sa linog ang nakadawat og panginabuhian isip ayuda sa Department of Trade and Industry (DTI) sa duha ka mga barangay sa Magsaysay, Davao del Sur Miyerkules, Septiyembre 23, 2020.
Unang giaporan sa DTI ang 57 ka mga benepisyaryo didto sa Barangay Malawanit, buntag sa maong adlaw.
Usa kanila mao si Mae Malasuge, 34, nakadawat og nagkadaiyang grocery items sa starter kit sa DTI aron makasugod pagpaninda sa ilang bag-ong pinuy-anan.
Hilabihan kaguba ang balay ni Mae dihang nahitabo ang sagunsong linog niadtong Oktubre 2019.
Ang laing benepisyaryo nga si Myrna Pantojan, 37, nalipay kaayo sanglit makatabang na kini sa iyang pagpatungha sa Grade 8 nga lalaking anak.
Giangkon ni Pantojan nga nabalaka gihapon siya sa takna nga masinati nga dunay pagtay-og apan dili na susama kaniadto nga anaa ang kakulba gumikan kay anaa sa fault line natukod ang ilang nahugmak nga pinuy-anan.
"Lahi na karon kay kabalo mi nga luwas na kaayo mi unya nindot kaayo ang gihatag nga balay sa amoa sa gobyerno," asoy niini.
Di pa dugay, nahatagan siya og balay sa National Housing Authority (NHA).
Nianang pagkahapon, giaporan sab sa DTI ang laing 47 ka mga indibiduwal sa Barangay Upper Bala nga giingong bag-o lang sab nakabalhin sa ilang bag-ong balay pinaagi sa NHA diin ang yuta napalit pinaagi sa "meal allowance" gikan sa kasundalohan.
Ang benepisyaryo nga si Melinda Daya, 40, nalipay kaayo kay makasugod na siya pagnegusyo sa kapin P2,000 ka mga nagkadaiyang grocery items.
Sumala ni Delia Ayano, DTI-Davao del Sur director, kabahin ang programa sa End Local Terrorist and Armed Conflict ngadto sa mga dapit nga gitawag og Geographically Isolated and Disadvantaged Area.
Matud ni Ayano nga 20 ka mga barangay sa Davao del Sur ang nalista sa programang panginabuhian aron hingpit nga makabangon gikan sa naagiang kalamidad.
Samtang, si Mayor Arthur Davin nag-awhag sa tanang benepisyaryo nga ayuhon pagpadagan ang ilang negusyo human nga nakadawat na og kapital ug maoy mahimong susi alang sa ilang paglambo ilabi na nga nanimuyo na sila sa libreng pabalay sa NHA.