MIABOT sa 143 ka mga olive ridley sea turtle hatchlings ang gipangbuhian didto sa Menzi Beach Park sa Mati City, Davao Oriental niadtong Pebrero 26 ug Pebrero 28, 2023.
Ang pagbuhi sa mga bag-ong pusang pawikan nahimong posible sa tabang sa Mati Watersports Association (MWA).
Ang mga pawikan giatiman sa MWA sulod sa 48 ka adlaw una kini gipangbuhian.
Unang gi-release ang 81 ka hatchlings niadtong Pebrero 26 ug nasundan niadtong Pebrero 28 sa 62 ka hatchlings.
Sa pagkakaron, anaay sobra usa ka libo pa nga mga itlog sa pawikan ang ginaatiman sa MWA didto sa turtle nursery na makita sa Menzi Visitors Information Office Center (MVIOC).
Samtang niadtong Pebrero 25, usa usab ka olive ridley ang nangitlog sa MVIOC. Sa tabang gihapon sa MWA, napahiluna ang 92 ka itlog niini sa hatchery aron maprotektahan kini batok sa mga manunukob.
Matud pa ni George Plaza, MWA advisor, nga halos kada gabii na nga dunay mangitlog nga pawikan sa baybayon sa Dahican.
Dugang usab niya nga ginapili sa mga pawikan ang lugar nga ilang pangitlogan. Usa sa rason nganong sa Dahican nagapangitlog ang mga pawikan tungod sa kalimpyo niini.
Nagapahigayon og coastal cleanup drive kaduha sa usa ka semana ang MWA aron nga mamentinar ang kalimpyo sa lugar.
Ang MWA mao ang asosyasyon dinhi sa dakbayan nga nagaprotekta ug nagapanalipod sa parehas niini nga specie sa pawikan.
Usa lamang kini nga timailhan nga ang kadagatan sa dakbayan sa Mati limpyo ug abunda. (CIO Mati/Ethel Marie Gastanes/JPC)