KANUNAY'NG ipatuman ang mga health protocols batok coronavirus disease (Covid-19) ug ang paghipos sa mga basura.
Kini ang makanunayong gipahinumdom sa awtoridad sa mga Dabawenyo nga mangadto sa Davao City Coastal Road human nga giablihan kini alang sa publiko sugod Enero 28, 2022.
Abli ang Davao City Coastal Road gikan alas 5 ngadto alas 8 sa buntag, ug mabalik pag-abli sa alas 3 sa hapon ngadto na alas 7 sa gabii.
Wala una gipasulod ang mga vehicles ug mga motorsiklo, diin ang aktibidad lamang sa sulod mao ang walking, biking, playing, jogging, exercise, ug ang skating.
"Kanindot gyod, proud kaayo nako nga ako usa ka Dabawenyo, nga taga Davao, indeed kini gayod ang ma-ingong Duterte's Legacy," mapasigarbuhong pagpaambit sa Dabawenyo nga si Esmael Gildore, taga Talomo District Davao City.
Ang Davao City Coastal Road dunay gitas-ong 18.2-kilometro nga nakatakdang inagurahan karong bulan sa Marso 2022 suma sa Public Works department official.