MOPAILAWOM na sa unom ka bulan nga kurso sa pagbansay-bansay ang 102 ka mga miyembro sa Moro Islamic Liberation Front (MILF) ug Moro National Liberation (MNLF) nga nakapasar sa recruitment process aron nga malakip sa han-ay sa Philippine National Police (PNP).
Apan sa di pa mahitabo, gipahigayon ang unang PNP Oathtaking Ceremony sa mga MILF, MNLF sa Police Regional Office-Bangsamoro Autonomous Region (PRO-BAR) Grandstand, Camp BGen Salipada K Pendatun, Parang, Maguindanao del Norte niadtong Huwebes, Agusto 10, 2023.
Ang maong seremonya giisip nga usa ka makasaysayanon, kon diin si Department of the Interior and Local Government (DILG) Secretary Bejamin Abalos Jr. maoy nahimong guest of honor.
Mga sakop sa MILF ug MNLF naapil sa quota alang sa Calendar Year 2023 Recruitment Program nga konmakatapos sila niini, duna na silay ranggo nga patrolmen ug patrolwomen.
Matod ni Abalos nga usa ka dungog alang kaniya ang pag-imbitar sa maong espesyal nga aktibidad.
Kini ang unang higayon sa kasaysayan sa nasud nga ang mga kanhi rebelde mahimong hingpit nga sakop sa nasudnong kapulisan.
Gipasalamatan usab niini ang gobyerno sa ilang kooperasyon aron nga ang mas malinawon ug malambuong Bangsamoro mas daling mapasiugda ug makab-ot.