MAMASAPANO, Maguindanao — Nanghikling ang mga sibilyan sa natigayong engkwentro sa mga armadong grupo alas 6 sa gabii, Lunes, Disyembre 18, 2023 didto sa probinsiya sa Maguindanao del Sur.
Matud ni Maguindanao Police Provincial Director Colonel Ruel Sermese nga nagka-engkwentro ang mga miyembro sa Moro Islamic Liberation Front (MILF) ug Bangsamoro Islamic Freedom Fighters o BIFF Karialan Faction sa Sitio Amilil, Barangay Tukanalipao, Mamasapano, Maguindanao del Sur.
Milungtad og usa ka oras ang sinukliay og mga bala tali sa duha ka pundok gamit ang mga tag-as nga matang sa armas.
Sa kahadlok nga maangin sa kagubot, nanghikling ang mga sibilyan paingon sa luwas nga dapit.
Nahunong ang pinusilay sa diha nga nahiabot ang puwersa sa militar ug kapulisan nga miabag sa MILF.
Usa ang patay sa MILF ug upat sa BIFF diin daghanan ang naangol gumikan sa dumot o rido sa magkaaway nga grupo.
Sa kasamtangan padayon nga gilutos sa Joint Task Force Central uban ang MILF ang grupo sa BIFF sa lungsod sa Mamasapano.