SI DAVAO City First District Representative Paolo Z. Duterte wala mosupak sa pagpadayon sa Mindanao Railway Project (MRP) nga gimugna sa miaging administrasyon sa iyang amahan nga si Rodrigo Duterte ug ipadayon matud pa sa administrasyon ni President Ferdinand Marcos Jr.
Hinuon miingon ang batan-ong kongresista nga kinahanglang tan-awon sa nasudnong kagamhanan ang daghang reklamo ug pasangil sa mga anomaliya sa pipila ka mga residente nga apektado sa planong proyekto.
Tungod niini, si Rep. Duterte uban ni Benguet Lone District Rep. Eric Yap misang-at sa House Resolution (HR) No. 286, nga nanawagan sa usa ka congressional investigation sa gisugyot nga MRP, ilabi na sa paagi sa Department of Transportation (DOTr) right-of-way acquisition ug expropriation sa pribadong mga kabtangan nga maapektuhan sa linya sa riles.
Matud ni Rep. Duterte nga nakadawat siya og daghang reklamo gikan sa mga residente sa Davao City kansang mga pinuy-anan direktang maapektuhan sa gisugyot nga linya sa tren.
Gidugang hinuon ni Rep. Duterte nga kinahanglang hatagan sab og gibug-aton ang mga reklamo ilabi na sa taho nga "adunay mga kalainan sa mga tanyag alang sa pagkuha sa right-of-way o expropriation sa mga pribadong kabtangan sa DOTr ug sa mga kontraktor niini, sub-contractors, ug sa ubang mga service providers.
Si Rep. Duterte ug Yap miingon nga ang imbestigasyon "makaseguro sa transparency ug accountability sa paggamit sa mga pundo sa publiko samtang kanunay nga ibutang sa hunahuna ang kaluwasan ug kaayohan sa kinatibuk-ang populasyon sa paghatag sa mga serbisyo publiko".
Niadtong 18th Congress, ang duha ka kongresista misang-at usab og susamang panawagan alang sa imbestigasyon.
Ang three-phase MRP naglangkob sa 1,530 ka kilometro nga circumferential ug spur rail lines nga magdugtong sa pipila ka lugar sa Mindanao sama sa Davao provinces, Iligan City, Cagayan de Oro City, General Santos City, ug Zamboanga Peninsula.
Ang Phase 1 sa MRP (Tagum-Davao-Digos segment) usa ka 105-km nga linya nga gipaabot nga makapakunhod sa oras sa pagbiyahe gikan sa Davao del Norte paingon sa Davao del Sur gikan sa 3.5 ka oras ngadto na lang sa 1.3 ka oras. Aduna kini walo ka estasyon: Tagum, Carmen, Panabo, Mudiang, Davao Terminal, Toril, Sta. Cruz, ug Digos. Usa ka 10 ka ektarya nga depot ang tukoron sa Tagum City. (Jeepy P. Compio/uban sa taho sa Davao Breaking News)