MITUGPA sa Southern Philippines Medical Center (SPMC) ang usa ka bana human giayo'g kulata sa asawa kay giingnan siya'g tambok ug kusog mokaon.
Human nagpa-medical certificate ang bana nga si alyas Roger, 37, sa SPMC, midangop kini sa Buhangin Police Station kay ipa-blotter ang asawa nga si Eva, 39, Sabado sa buntag.
Nasayran nga samtang naa sila Roger sa panimalay sa iyang ugangan uban ang asawa, kalit silang naglalis human gisiawan sa bana ang iyang asawa nga tambok na kini ug dakog kaon.
Sa kasuko sa asawa, iyang gibugno ang iyang bana, dayon giayog sumbag ang baba ug gipangkarwas ang kalawasan.
Sumbong sa bana nga usa sab sa hinungdan sa ilang away mao ang mga babaye nga naga-add sa iyang Facebook dihang usa ka adlaw niana, nasakpan kini sa iyang misis.
“Tambok naka, ug dako kaayo ka'g kaon,” ang napatik sa blotter nga sulti sa bana ngadto sa misis.
Gidugang sa bana nga ikalima na kini ka higayon nga gibuhat sa iyang asawa ngadto kaniya.
Gitambagan si Roger sa pulis nga modangop sa barangay aron didto sila maghusay.