DAKPAN sa Lupon Municipal Police Station ang usa ka miyembro sa Savillano Criminal Gang nga gikonsiderang Davao de Oro PIU-DI Listed alas 12:40 sa udto sa Purok Malinawon, Barangay Ilangay, Lupon, Nobyembre 2.
Sumala ni Police Major Butch Kevin P Rapiz, acting chief of police sa Lupon Municipal Police Station, nga ang suspek nailhan lamang sa alyas Jay, 25, nagpuyo sa nasampit nga dapit.
Nasayran nga nalambigit ang suspek sa gun-for-hire, gun-running ug uban pang criminal activities sa area of responsibility sa Davao de Oro, Davao del Norte ug sa Davao Oriental.
Ang suspek nadakpan pinaagi sa standing warrant of arrest niini nga giisyu sa presiding Judge sa 11th Judicial Region, Regional Trial Court, Branch 3, Nabunturan, Davao de Oro.
Kasong murder nga walay piyansa ang unod sa warrant batok sa suspek kinsa nakuhaan og usa ka unit sa 9-milimetro Armscor pistol dunay magazine nga loaded sa onse ka mga bala.
Kasohan ang suspek og paglapas sa Republic Act No. 10591 kun Comprehensive Law of Firearms and Ammunition.