AWAY sa yuta ang gilantaw sa mga awtoridad nga motibo sa pagpaarak sa mga armadong grupo sa molupyo sa Sitio Saging, Barangay Ginatilan, Pikit, Cotabato Province alas 2 sa kaadlawon niadtong Sabado, Hulyo 2, 2022.
Namatay atol sa insidente mao si Gilbert Roa, 45, minyo ug miyembro sa Barangay Peacekeeping Action Team (BPAT). Samtang naangol sab ang mga silingan nga sila si Eleonor Umutong ug Kho Inok.
Matud ni Pikit Chief of Police Major Maxim Peralta nga nangatulog na ang mga biktima sa ilang balay sa dihang kalit lang gipaulanan sila og mga bala sa wala mailhing armadong lalaki gamit ang M16 Armalite rifles kinsa dali sab dayong misibat sa wa masayring lugar.
Samtang mga biktima daling gihatud ngadto sa Cruzado Medical Hospital apan namatay si Roa.
Ang lokal nga panggamhanan sa Pikit, pagpanguna ni Mayor Sumulong Sultan, nagpaabot na og tabang ngadto sa pamilya sa napatay ug mga naangol.
Padayong nagpangita ang kapulisan sa Pikit Municipal Police Station sa mga suspek aron nga mailhan, madakpan ug pasakaan sila og kaso.