DAVAO DEL NORTE -- Timbog sa mga pulis ang usa ka musician sa gilusad nga buy-bust sa Purok 17, Villarosa Subdivision, Barangay New Visayas, Panabo City alas 4:55 sa buntag, Lunes, Agosto 14, 2023.
Ang suspek giila nga si Ian YcoyTutor alyas Jem- Jem, 30, ulitawo, musician, ug molupyo sa Purok 2, Barangay New Visayas, Panabo City.
Subay sa report, nasayran nga ang suspek nasikop pinaagi sa kapulisan sa Panabo City Police Station uban sa lain pang mga yunit atol sa gilusad nga operasyon sa nahisgutang lugar.
Matud pa nga nakumpiska gikan sa posisyon sa suspek ang usa ka sachet sa gituohang shabu, Php 500.00 bill nga marked money ug lain pang upat ka sachets nga dunay sulod nga gituohang shabu.
Ang suspek ug ang nasakmit nga druga nga gibana-banang dunay gimbug-aton nga 0.233 gramo nagkantidad og Php 1,584.40 ug uban pang mga ebidensiya gikustodiya na sa Panabo City Police Station samtang gihikay ang kasong paglapas sa Republic Act 9165 nga ipahamtang batok sa suspek.