DAVAO DE ORO -- Mokabat sa 35 ka mga estudyante sa Community Technical College of Southeastern Mindanao (CTCSM) sa Lungsod sa Maco ning probinsiya, ang gi-isolate na karon sa isolation facility sa probinsya nga anaa mahimutang sa lungsod sa Nabunturan.
Matud pa na ang maong mga estudyante i-quarantine sulod sa katorse ka adlaw isip kabahin sa gipatumang health protocol sa probinsiyal nga kagamhanan sa probinsiya una sila tugtan nga mamauli sa tagsa-tagsa nila ka mga probinsya.
Gibutyag nga ang maong mga estudyante, gilangkuban sa 16 ka babaye ug 19 ka mga lalaki diin gi-agi sa Rapid Diagnostic Test para sa Covid-19 aron maseguro nga luwas sila sa virus.
Ang probinsyal nga kagamhanan ang mohatag sa mga nag-unang panginahanglan sa mga estudyante sama sa pagkaon ug mga hygiene kits sulod sa katorse ka mga adlaw.
Nagpasalamat ang gobernador sa probinsya nga di Jayvee Tyron Uy sa kooperasyon sa eskwelahan alang sa kaayuhan sa mga bata.
Kahinumdoman nga ang kahimtang sa mga estudyante nasayran sa gobernador human nga dunay estudyante nga nagpatabang sa kapitan sa barangay gumikan kay gusto nang muoli sa ilang dapit.
Gilayong gipasusi ni Governor Uy ang tunghaan diin nasayran nga gawas sa mga estudyante, dunay mga magtutudlo ug mga guardians sa mga estudyante nga natanggong human naabtan og lockdown, sanglit magpahigayon pa unta ang graduation niadtong Marso 17, 2020 diin ang lockdown gipatuman niadtong Marso 15, 2020.
Sa pagkakaron, malaumon si Governor Uy nga luwas ug himsog ang paglawas sa mga estudyante nga makauli sa tagsa-tagsa nila ka mga probinsiya. (Dexter T. Visitacion)