PADAYON pang giila sa Public Safety and Security Office (PSSO) ang tawo nga maoy nagpaluyo sa pagsulat-sulat (vandalism) sa abatanan sa tulay sa Davao City Coastal Road.
"Dili man nato na madali-dali pero siyempre basin maka-tsamba ta nga naay nagbinuang, atong dakpon," pasalig ni PSSO head Angel Sumagaysay sa dihang nahinabi uban ang SunStar Davao, Lunes, Hulyo 17, 2023.
Kahinumdoman nga dunay hulagway nga gisulat-sulatan ang abatanan sa tulay Hulyo 12 nga nahimong viral, ug nakakuha sa pagtagad sa mga netizens ug mga opisyal sa siyudad sa Davao.
“[A]yay nagsugod na sila... *sad emoji* [sic]," ang post sa Facebook user Bon Bon.
Sumala ni Sumagaysay nga ilang naobserbahan nga mga indibiduwal nag-vandalize sa ilang mga ngalan sa abatanan sa tulay subay sa coastal road.
Gisulti niya nga ang ilang buhatan kanunay nga nagpahimangno sa katawhan nga likayan ang bandalismo apan duna pa gihapoy uban ang gahi og ulo nga nagpadayon sa paghugaw-hugaw ug vandalize sa dalan.
Eksplikar sa opisyal nga kadtong madakpan nga nagbandal mag-atubang og kaso base sa Anti-Littering Ordinance.
Nanawagan sab si Sumagaysay sa mga Dabawenyos nga madisiplinahon - nga di magbandal sa mga propedad sa publiko nga naglakip sa coastal road.
"Makita natong daghan vandalism sa siyudad, dili na dapat na i-remind na sa mga tawo, naa man ta’y pangutok, kabalo man ta nga tama ba ning bandalan ko ni o dili, nasa tawo gyud na siya,” pagtin-aw ni Sumagaysay.