GIKUSTODIYA na sa Criminal Investigation and Detection Group-Davao City Field Unit (CIDG-DCFU) ang lalaki nga suspek sa pagsunog sa Lapanday Corporation Plastic Plant nga gikamatay sa usa ka fish vendor atol sa pagbusikad sa improvised explosive device (IED) niadtong Abril 29, 2017 sa Mandug, Buhangin, Davao City.
Ang suspek giila sa CIDG-DCFU nga si alyas Ondo Paparts, 36, minyo ug kanhi miyembro sa Pulang Bagani Command (PBC) 1, SOG Regional Operations Command sa Southern Mindanao Regional Committee (SMRC) nga naglihok sa Davao City, Davao del Norte ug Kidapawan area.
Sumala ni CIDG-Regional Field Unit (RFU)-Davao Region Deputy Regional Chief Police Lieutenant Colonel Milgrace Driz nga top five most wanted person sab sa Davao City Police Office (DCPO) ang suspek kinsa duna sab mga warrant sa Davao de Oro ug miangkon nga iyang partisipasyon sa kalihukan sa walhong pundok.
Nasikop ang suspek Miyerkules sa udto, Pebrero 23, 2022, sa pinuy-anan niini sa Purok 2B, Upper Dampa, Barangay Magtuod, Davao City.
Sa pagsuwat ning balita Miyerkules, nagpadayon ang pagpresentar sa suspek ngadto sa mga sakop sa media sa usa ka hamubo nga press conference sa Magsaysay Park, Davao City nga gipangunahan ni Police Colonel Chulijun Caduyac, ang regional chief sa CIDG-RFU.