PATAY ang managsoon nga frontliners sa pagpanulis alas 2 sa hapon niadtong adlaw nga Sabado, Septiyembre 26, 2020, sa probinsya sa Cotabato.
Giila ang mga biktima nga sila Haizon Lauban Wahab, 35 anyos, minyo, ug ang iyang igsoon nga nurse nga si Bai Puti Pepcy Lauban Wahab, mga molupyo sa Barangay Dalican, Datu Odin Sinsuat, Maguindanao.
Gibutyag ni Pikit Chief of Police Captain Mautin Pangandigan nga gipamusil ang mga biktima sa tulo ka wala mailhing tawo sa Sitio Pogpog, Barangay Inug-ug, Pikit, North Cotabato gamit ang kalibre .45 nga pistola.
Abtik sab nga miikyas ang mga suspetsado dala ang motorsiklo sa nurse nga Honda Click 125, sling bag nga dunay sulod nga dakong kantidad sa kuwarta, duha ka cellphone ug uban pa nga mga personal nga kagamitan.
Gidugang ni Pangandigan nga naghulat ang managsoon sa tawo nga ilang nakaila sa social media (online reseller) sa paliton unta nga motorsiklo.
Ang babaye nga biktima usa ka nursa sa Datu Blah Sinsuat District Hospital sa North Upi, Maguindanao samtang ang iyang igsoon sakop sa usa ka miyembro sa radio group ug pulos mga frontliner batok Covid-19.
Padayon nga nag-imbestiga ang kapulisan sa Pikit, Cotabato kalabutan sa maong hitabo.