CATEEL, Davao Oriental -- Ospital ang gitugpahan sa usa ka lalaki atol sa Pasko human nahilo sa pesticide nga giinom uban sa iyang ig-agaw tungod sa kalipay nga nagkauli sila sa maayong kabubut-on human sa dugay’ng panahon nga pagkabangi didto sa Barangay Malibago, Cateel alas 12:30 sa udto, Disyembre 25.
Sa report nga nakuha gikan sa Compostela Emergency Respond Team (COERT) sa pakighinabi sa ginganla’g Lovely, gibutyag niini nga usa ka Alex Cabanilla, 24, minyo, molupyo sa Barangay Malibago sa maong lungsod ang gidala ngadto sa iyang mga paryentihan sa opisina sa lungsod sa Compostela ug nagpatabang nga madala ang biktima ngadto sa balay tambalanan sa lungsod sa Montevista.
Dugang gisaysay sa asawa ni Cabanilla nga atol sa Pasko, nagkauli sa maayong kabubut-on ang biktima ug ang ig-agaw niini nga hataas nang katuigan nga nagkabangi.
Ug agi’g pag-selebrar nga sila nag-uli sa maayong kabubut-on, nagkasabot nga magtagay og Coradan, usa ka pesticide nga gigamit alang sa mga pananum.
Unang nadala ngadto sa lungsod ang biktima nga si Alex gisundan sa iyang ig-agaw aron nga mangayo og tabang sa COERT hinungdan nga malampusong nahatud ngadto sa Comval Provincial Hospital sa Montevista ug sa pagsuwat ning balita Huwebes, Disyembre 26, padayong gitambalan.