GIHAN-AY na ang kaso nga ipasaka batok sa baynte ka mga indibiduwal ug mismong sa tag-iya sa resort human gidili ang tapok-tapok, nangaligo kini sa swimming pool luyo sa pagpatuman sa General Community Quarantine (GCQ) with heightened restrictions.
Sa report gikan sa Davao City Police Office, natigayon ang usa ka birthday party sa usa ka resort sa Catalunan Pequeño, Davao City diin sa maong party duna pa'y mga bata.
Pasado alas 4 sa hapon, giadtoan sa awtoridad ang maong resort sa Kilometro 13 diin naabtan ang 20 ka indibiduwal nga nag-party.
Sumala sa DCPO nga klarong nakalapas ang maong resort sa "MC number 21-28 series of 2021 ubos sa category III, MICE".
Giingon nga di mamahimong mag-operate ang usa ka resort ug dili modawat og social events ubos sa DTI advisory 21-16 Guidelines sa GCQ.
Lakip na nga gihan-ay ang mga dokumento sa paglapas sa City Ordinance in relation to Republic Act 11332 batok sa mga malapason. (Jeepy P. Compio)