TUNGOD sa selos kay giingong dunay kabit ang kaipon, nahimo sa ka-live-in partner nga sunogon ang ilang balay, hinungdan nga naapil sab siya og pagkasunog pasado alas 8 sa gabii, Lunes, didto sa Kilometro 24, Purok Inabanga, Barangay Bunawan, Davao City.
Ang Bunawan Police Station nag-ila sa biktima nga si Philip Coma, 47 anyos ug residente sa maong dapit.
Sa inisyal nga imbestigasyon, gidabdaban sa biktima ang iyang balay samtang anaa siya sa sulod ug wa na migawas.
Sumala sa hepe sa investigation division sa Davao City Fire District, Senior Fire Officer 2 Ramil Gillado, nga napungot si Coma dihang nasayran niini nga dunay laing kaipon ang iyang partner.
Dugang pa nga dihang nasayran sa biktima ang sekreto nga gitago sa iyang asawa, nagpunay na kini'g wild.
Sa maong hitabo, tulo ka mga balay ang naugdaw sa sunog nga dunay damyos nga mokabat kapin kun kulang P135 mil.