KASONG Anti-Fencing Law ang gipasaka batok sa usa ka lalaki kinsa mibaligya og flavored special cut chicken ngadto sa nagtakuban nga pulis atol sa entrapment operation alas 5:30 sa hapon niadtong Sabado, Hulyo 27, sa parking area sa Victoria Plaza, Bajada, Davao City.
Ang Criminal Investigation and Detection Group (CIDG) Davao City Field Unit (DCFU) ug Sta. Ana Police Station ang mihimo sa operasyon diin malampusong nasikop ang usa ka Candiver del Puerto Padua, hamtong ang pangedaron.
Subay sa report, ang suspek maninda og flavor special cut chicken nga eksklusibo lamang alang sa usa ka dakong foodchain diin dili kini puwede nga mabaligya sa publiko nga iya sa San Miguel Foods Corporation.
Gireklamo ang suspek dihang iya kining gipamaligya diin giingong gikompra ra sab niya gikan sa tawo nga anaa nagtrabaho sa San Miguel Foods Corp.
Pagdawat sa suspek sa kuwarta gikan sa nagtakuban nga pulis, gilayon siyang giposasan ug gidala sa CIDG-DCFU.
“The CIDG Davao City is reminding the public to be aware of the modus operandi of unauthorized selling of products or goods exclusively manufactured for a certain establishment or business,” tipik sa pahayag sa CIDG-DCFU pinaagi sa ilang chief Police Captain Milgrace Cajes Driz.
Mokabat P1,540 nga sapi ang nakuha sa posisyon sa suspek lakip na ang unom ka putos sa flavored special cut chicken.
Priso karon ang suspek sa selda sa CIDG-DCFU. (Jeepy P. Compio)