"TOO much love will kill you" kanta nga gipasikat sa artist nga si Queen nga maoy nagpamatuod nga mopatay gayod ang tumang gugma.
Kini ang nahitabo sa usa ka 50 anyos nga babaye kinsa napalgan na lang nga wala nay kinabuhi ug dunay daghang samad-tinigbasan sa iyang kalawasan nga hinimoan sa iyang kapuyo nga 58 anyos.
Ang insidente nahitabo udto niadtong Lunes didto sa Purok 10, Barangay Tibungco, Bunawan District, Davao City.
Nailhan ang biktima nga si Marissa (bansagon gitago), 50 anyos, samtang ang suspek nga nahimong kapuyo sud sa unom ka tuig mao si Nemesio Blanco Modequillo, 58 anyos.
Sumala sa report sa Bunawan Police Station nga gituohang tungod sa selos ang hinungdan nga giayo kini'g tadtad sa suspek gamit ang sundang hangtud namatay ang biktima.
Giingon nga napungot ang suspek dihang iyang nasayran nga dunay kabit ang iyang kapuyo.
Nasayran nga natigayon pa ang panaglalis sa duruha hangtud misangko nga mikuha og sundang ang suspek dayon iyang gitigbas sa iyang kapuyo sa makadaghang higayon nga miresulta sa hinanaling kamatayon sa biktima.
Ang patay nga lawas sa biktima anaa gihaya sa Rivera Funeral Homes sa Licanan, Lasang ning siyudad samtang ang suspek nagtingkagol sa prisohan.