ANG Davao City Social Welfare and Development Office (CSWDO) nihangyo sa mga Dabawenyo nga dili mohatag og limos o kuwarta isip pinaskohan sa mga mibisita nga miyembro sa Indigenous Communities sa Davao kay basin og mas makadaut na hinuon kini kanila.
Si CSWDO Supervising Administrative Officer IV Julie Dayaday niingon nga ang kantidad nga gihatag sa mga IP members, samtang nagpakilimos sila sa kadalanan, dili makabayad sa gasto sa ilang kinabuhi sa higayon nga malambigit sila sa aksidente sa sakyanan.
"Ang kanang atong ginahatag nga baynte pesos sa ilaha, kung mohatag man tag baynte pesos, pero maligsan man galing sobra pa sa bayte pesos ang ilang magasto," ingon ni Dayaday.
Matud niya nga samtang ang Pasko panahon sa paghatag, mahimo kini sa tukma nga mga lugar -- sa koordinasyon sa tukma nga ahensiya ug konsiderasyon sa kaluwasan -- dili sa kadalanan.
"Nindot man gyud mag-pasko kay pasko man gyud, this is the time for giving and sharing but the risk wala ni siya nakita sa atoang mga igsuong lumad. Ang ilaha lang nga makadawat sila og pamasko but ang risgo, wala na nila nakita, mao bitaw ang panawagan sa atoang kaigsuonan kay naa man ta'y anti-mendicancy law kung pwede dili lang gyud ta mohatag sa ilaha didto sa dalan," dugang sa opisyal.
Matud pa ni Dayaday nga kadaghanan sa mga lumad nga bag-o lang mianhi sa Davao City gikan sa silingang mga lungsod ug ang pag-abag kanila kinahanglang anaa sa koordinasyon sa DSWD-Davao.
Niadtong Nobyembre 19, ang CSWDO, uban sa koordinasyon sa lungsod sa Talaingod ug Laak, naghatud sa mga IPs sa ilang tagsa-tagsa ka pinuy-anan. Naghatag usab ang lungsod og mga grocery packs sa mga namalik nga IP.
Matud pa ni Dayaday nga iyang gitambagan ang mga Municipal Social Welfare and Development Officers (MSWDOs) sa maong mga lungsod nga dasigon ang mga IPs pinaagi sa ilang mga datu nga dili moadto sa ilang mga silingang siyudad panahon sa Pasko.
Giawhag usab niya sila sa pagsundog sa Pahalipay sa Lumad, nga gipahigayon sa Davao City, diin ang mga miyembro sa CSWDO mismo ang moadto sa mga komunidad aron manghatag og mga regalo sa mga IPs.
Matud pa ni Dayaday nga aduna pay nahabilin nga mga miyembro sa IP community sa Davao ug ila nang giila ang ilang gigikanan. Gibuhat nila ang ilang labing maayo aron makig-alayon sa mga LGU sa gawas sa Rehiyon 11 alang sa ilang pagbalik ngadto sa ilang tagsa-tagsa ka mga dapit sa kabukiran.