Napalgang patay naay sakit sa kalimot

Ang patay'ng lawas sa lola nga halos kalabera na nga nakit-an.
Ang patay'ng lawas sa lola nga halos kalabera na nga nakit-an. Hulagway iya sa Laak Municipal Police Station

DUNAY sakit sa kalimot ang lola kansang patay’ng lawas napalgan sa bukirang bahin sa Purok 18, Tuk-an, Barangay Poblacion, Laak.

Ang biktima giila nga si Subaida Ayonan Japalali, 72, minyo ug molupyo sa Purok 18, Sitio Tuk-an, Barangay Poblacion, Laak .

Gibutyag nga alas 2:30 sa hapon, Nobyembre 21, 2023, usa ka nagpakabanang lungsuranon ang nagpahibalo sa Laak Municipal Police Station may kabahin sa patay’ng lawas nga napalgan sa maong lugar nga dunay gilay-on nga 200 metros gikan sa ilang panimalay sa Purok 18, Tuk-an.

Daling niresponde ang kapulisan sa Laak Municipal Police Station ug milusad og pakisusi.

Giila ang biktima sa mismong anak niini nga si Teresita Ayonan Japalali, 54, nga taga Barangay Madaum, siyudad sa Tagum.

Matud pa nga ang pag-ila sa anak sa inahan base sa sapot nga gisul-ob sa biktima sa ulahing adlaw nga nakit-an kini.

Giingon nga ulahing nakit-an ang biktima sa iyang bana nga si Amid Biay Japalali , 82, niadtong Septyembre 24, 2023 dihang ang duha nagplano nga mangadto sa siyudad sa Tagum aron nga magpa-check up apan ang biktima wa magka-interest niini ug wa milahos sa siyudad sa Tagum.

Gibiyaan kini sa bana nga si Amid didto sa bus terminal sa Laak sanglit ang lalaki mao ra’y mipadayon sa biyahe paingon sa siyudad sa Tagum.

Si Amid nagtuo nga ang asawa nawala gumikan kay miadto kini sa iyang mga paryente sa siyudad sa Cotabato.

Apan alas 6:00 sa buntag, Nobyembre 21, 2023, ang patay’ng lawas sa biktima napalgan diin nagsugod na kini sa pagkadugta.

Gisulti ni Teresita nga ang iyang inahan nag-antos sa Aizheimer’s disease ug uban pang balatian sa lawas gumikan sa nagkataas nga edad niini nga maoy hinungdan nga wa kini makauli sa ilang panimalay.

Wa’y nakit-ang foul play ang awtoridad sa kamatayon sa biktima.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph